काठमाडौं। क्रिकेटको इतिहासमा कतिपय यस्ता रातहरू आउँछन्, जसले कुनै एक खेलाडीको भाग्य र पूरै खेलको माहोल सधैँका लागि बदलिदिन्छन्। मुल्लानपुरको महाराजा यादविन्द्र सिंह इन्टरनेसनल क्रिकेट स्टेडियममा आज शुक्रबार, २९ मे को रात एउटा यस्तै महायुद्धको साक्षी बन्न गइरहेको छ, जसलाई हेर्न पूरा क्रिकेट जगत सास रोकेर प्रतीक्षामा बसेको छ। यो अवसर हो आईपीएल २०२६ को क्वालिफायर-२, जहाँ गुजरात टाइटन्स र राजस्थान रोयल्सबिच फाइनलको टिकट हात पार्न दर्शकहरु कडा मेहनत गरिरहेका छन्। आज जित्ने टोली सिधै फाइनलमा प्रवेश गर्नेछ भने हार्ने टोलीको चम्किलो ट्रफी उचाल्ने सपना यहीँ चक्नाचुर हुनेछ। 

शुभमन गिलको कप्तानीमा रहेको गुजरात टाइटन्सले आईपीएल २०२६ को लिग चरणमा उत्कृष्ट खेल प्रदर्शन गर्दै अंक तालिकामा दोस्रो स्थान हासिल गरेको थियो। तर, क्वालिफायर-१ मा रोयल च्यालेन्जर्स बेंगलोरुको हातबाट बेहोरेको ९२ रनको करारी हारले टोलीको मनोबललाई केही असर गरेको छ। अब गुजरातको टोली आफ्ना ती गल्तीहरू सुधार्दै फाइनलमा पुग्नका लागि पूर्ण जोड लगाउनेछ। टोलीसँग जोस बटलर, राशिद खान, मोहम्मद सिराज र कागिसो रबाडा जस्ता खतरनाक र अनुभवी म्याच-विनरहरू छन्, जसले एक्लै खेलको पाङ्गो पल्टाउन सक्छन्। 

अर्कोतर्फ, राजस्थान रोयल्सको टोली यतिबेला जितको रथमा सवार छ र उनीहरूको आत्मविश्वास सातौँ आसमानमा छ। युवा कप्तान रियान परागको नेतृत्वमा राजस्थानले एलिमिनेटर खेलमा सनराइजर्स हैदरावादलाई ४८ रनले पराजित गरेको थियो र टोलीले लगातार पछिल्ला तीन खेल जितिसकेको छ। १५ वर्षका ुवन्डर किडु वैभव सूर्यवंशीको विस्फोटक ब्याटिङ र जोफ्रा आर्चरको आगो ओकल्ने बलिङको बलमा राजस्थानको हरेक विभाग यतिबेला सन्तुलित देखिएको छ। टोली आज यही विजयी लयलाई कायम राख्दै फाइनलको टिकट पक्का गर्न चाहन्छ। 

मुल्लानपुरको पिच आईपीएल २०२६ मा ब्याट्सम्यानहरूका लागि स्वर्ग साबित भएको छ। यस मैदानमा खेलिएका पछिल्ला ६ खेलहरूमा पहिलो इनिङ्सको औसत स्कोर झन्डै २२० रन रहेको छ। यसै मैदानमा खेलिएको पछिल्लो खेलमा राजस्थान रोयल्सले हैदरावादविरुद्ध २४५ रनको विशाल स्कोर खडा गरेको थियो, जसले यहाँको परिस्थितिलाई प्रस्ट पार्छ। यहाँ सुरुवाती ओभरहरूमा राम्रो गति (पेस) र बाउन्स पाइन्छ, जसले गर्दा सट्स खेल्न सजिलो हुन्छ। नकआउट खेलको दबाबलाई हेर्दा, जसले टस जित्छ, त्यो कप्तानले पहिले ब्याटिङ गरेर बोर्डमा ठुलो स्कोर खडा गर्न रुचाउनेछ।

यदि आईपीएल इतिहासको तथ्याङ्कलाई हेर्ने हो भने गुजरात टाइटन्सको पल्ला राजस्थान रोयल्समाथि सधैँ भारी रहेको छ। दुवै टोलीबिच हालसम्म कुल १० खेल खेलिएका छन्, जसमा गुजरातले ७ खेलमा जित हात पारेको छ भने राजस्थानको भागमा मात्र ३ जित परेको छ। यद्यपि, आईपीएल २०२६ को यस सिजनमा कथा फरक रहेको छ। लिग चरणका क्रममा दुवै टोलीले एकअर्कालाई एक-एक पटक पराजित गरेका थिए, जसले गर्दा आज रातिको यो महामुकाबला सही अर्थमा दुवै टोलीको शक्तिको वास्तविक परीक्षा साबित हुनेछ।

गुजरात टाइटन्स: साई सुदर्शन, शुभमन गिल (कप्तान), जोस बटलर (विकेटकिपर), वासिङ्टन सुन्दर, निशान्त सिन्धु, जेसन होल्डर, राशिद खान, अरशद खान, कागिसो रबाडा, मोहम्मद सिराज, प्रसिद्ध कृष्णा।  

राजस्थान रोयल्स: यशस्वी जयसवाल, वैभव सूर्यवंशी, ध्रुव जुरेल (विकेटकिपर), रियान पराग (कप्तान), डोनोभन फरेरा, दासुन शनाका, रवीन्द्र जडेजा, जोफ्रा आर्चर, नान्द्रे बर्गर, बृजेश शर्मा, यश राज पुन्जा। एजेन्सी