काठमाडौं। प्रधानसेनापति अशोकराज सिग्देलले अन्तरिम सरकारको खाका तयार गर्ने सन्दर्भमा धरान नगरका मेयर हर्क साम्पाङ र चर्चित मेडिकल व्यवसायी दुर्गा प्रसाईंलाई सैनिक मुख्यालय जङ्गीअड्डामा बेलाएर परामर्श गरेका छन् । जेन-जी समूहको अगुवाईमा भएको आन्दोलन थामिएपछि उनीहरुसँग भएको यो परामर्शले जेनजी समूहलाई नै झस्काएको देखिएको छ ।

जेन(जी आन्दोलनपछि उत्पन्न विषम परिस्थितिको निकास खोज्न विभिन्न पक्षबीच संवाद तीव्र भएको छ। आज बुधबार जेन–जी प्रतिनिधिहरूसँगै दुर्गा प्रसाईं र धरानका मेयर हर्क साम्पाङ पनि सैनिक मुख्यालाय पुगेका हुन् ।

प्रसाईंले अपराह्न प्रधानसेनापति अशोकराज सिग्देलसँग भेटवार्ता गरेका छन्। भेटपछि प्रसाईंले देशको पछिल्लो अवस्था र भावी मार्गबारे गहिरो छलफल भएको बताएका छन्।

उनले आफूलाई नेतृत्वको कुनै मोह नरहेको र देशले जसरी निकास पाउँछ, त्यही नै आफ्नो प्राथमिकता भएको बताएका छन्। प्रसाईंले बालेन्द्र शाह वा सुशीला कार्की जसको नेतृत्वमा पनि नागरिक सरकार गठन भए आफूलाई स्वीकार्य हुने धारणा राखेका छन्।

यस्तै, धरान उपमहानगरपालिकाका मेयर हर्क साम्पाङ पनि जङ्गीअड्डा पुगेका छन्। उनको भेटवार्ताबारे भने विस्तृत केही सार्वजनिक भइसकेको छैन।